【The Sydney post】上海周日（21日）舉行嘅「2019上海國際半程馬拉松賽」，期間中國跑手吳向東，以1小時6分15秒成績勇奪男子組第十名，而齋計中國藉跑手，更加係第一名。不過比賽期間卻發生尷尬一幕，吳向東因半途中突然肚痛，最後忍不住「邊跑邊瀨」，衝線時成腳都係啡色嘅汁液，難怪網民話，呢個係「一個有味道的冠軍」！
雖然吳向東嘅成績已經唔曳，但佢賽後表示自己應可跑得更快。佢喺今次賽事中途減慢咗速度，原因正正係肚痛作怪。吳向東跑到約10公里左右時，開始瘋狂搞肚，直至14公里時，忍唔住出現失禁情況，搞到成地都係「黃金」，瀨屎嘅情況足足維持咗4公里。
就係因為吳向東果斷瀨屎，令佢於比賽末段發揮小宇宙，衝線時壓過埋非洲跑手攞到第十名，當中更冇任何中國跑手跑得快過佢。吳賽後即跑到廁所處理身上排泄物，情況相當狼狽。事後他更在社交平台稱「感覺褲子不想要了」、「釋放完了就是舒服，衝刺都有勁」，但都自嘲「這場比賽不想回憶！」。佢話呢次意外，極可能因為件衫濕咗，貼住個肚跑令佢搞肚痛；賽前佢只係飲過水同食過麵包，所以估計唔係食物有問題。（東網）
